மணவாளக்குறிச்சி பகுதியில் திருட்டு சம்பவத்தில் ஈடுபட்ட 3 பேர் கைது

மணவாளக்குறிச்சி மற்றும் அதன் சுற்றுப்பகுதிகளில் மோட்டார் சைக்கிள் திருட்டு மற்றும் செயின் பறிப்பு ஆகியவை தொடர்ந்து நடந்து வந்தது. இதையடுத்து இந்த திருட்டுச் சம்பவத்தை தடுக்க போலீசார் பல்வேறு நடவடிக்கைகளை எடுத்து வருகின்றனர். மேலும் திருட்டுச் சம்பவத்தை தடுக்க போலீசார் தீவிர வாகன சோதனையிலும் ஈடுபட்டனர்.

இந்நிலையில் நேற்று போலீசார் வாகன சோதனையில் ஈடுபட்டு வந்தனர். அப்போது அந்த வழியாக ஒரே மோட்டார் சைக்கிளில் 3 பேர் வந்தனர். இதில் சந்தேகம் அடைந்த போலீசார் அந்த மோட்டார் சைக்கிளை தடுத்து நிறுத்தி அதில் இருந்தவர்களிடம் விசாரணை நடத்தினார்கள்.

அதில் அவர்கள் முன்னுக்கு பின் முரணான தகவல்களை கூறினார்கள். இதனால் போலீசார் அவர்களை போலீஸ்நிலையம் அழைத்துச் சென்று விசாரணை மேற்கொண்டனர். அதில் அவர்கள் வடக்கன் பாகம் பகுதியை சேர்ந்த முகமது அல்தாப் (வயது 21), அஜிமன்கான் (வயது 19), முகமதுரிஜாடவ்பிக் (வயது 19) என்பது தெரியவந்தது.

தொடர்ந்து போலீசார் அவர்களிடம் விசாரணை நடத்தியதில் அவர்கள் திருநயினார் ஏலப்பகுதியில் நடந்த 3 பவுன் செயின் பறிப்பு மற்றும் மோட்டார் சைக்கிள்களை திருடிய சம்பவத்தில் தொடர்புடையது தெரிய வந்தது. இதையடுத்து போலீசார் அவர்களை கைது செய்து விசாரணை நடத்தி வருகின்றனர்.